有線新聞噚日有隻故仔，講香港水球隊10月參加國際沙灘水球公開賽，仲喺沙灘訪問幾位隊員，其中一位充滿陽光氣息又靚仔，加埋一身肌肉，驟眼睇仲以為係男模，睇清楚原來係會德豐（020）主席吳光正乖仔吳宗權（Douglas）。
水球港隊成員
富二代當中，Douglas出咗名係運動健將，除咗有跑渣打馬拉松，2006年亦曾代表香港參加亞運水球賽，前年仲喺石澳落海救咗一名遇溺老婦。
不過Douglas平日好低調，好少做訪問，有線捉到佢講幾句，唔知係佢畀面同系公司有線（1097），還是因為佢熱愛水球，幫港隊講兩句冇所謂呢？有線又冇公開佢中文名，只係畀個「Doug Woo」嘅名佢喎，同時受訪嘅隊友先有中文名。
Douglas話，比起平時喺室內泳池打波，喺沙灘打，勝在唔使租池，而且啲海水浮力好啲，容易啲打波。
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24