有日趕住返工行過街口見到有間舖頭執咗笠，眼尾睄咗一眼，之後諗咗好耐，究竟呢間以前係咩舖頭呢？行多兩步，腦袋一叮，噢，係機舖，係十幾年冇入過嘅機舖，Sorry之餘，亦浮起好多以前擺低一個個一蚊雞嘅美好時光。
當年打機，仇恨可能多過興奮，尤其響某日出現雙打挑機呢回事，你好地地打緊街霸之際，突然一位金毛叼住口煙坐落隔籬，然後施施然逐個一蚊一蚊咁入錢，再掃一掃耳邊兩條毛跟住左手一拍，挑機！唔知點解每次被人挑戰，我都係輸家，而我亦習慣咗一被人K.O.，就頭也不回向另一邊走，因為嗰班金毛贏咗之後扯煙個樣，實在係太得戚，令人作嘔。
要成為令人佩服嘅一代宗師，就一定要識咩叫做贏得有風度，呢個星期睇世錦賽就學到嘢，當嗰位德國籍鉛球選手見到死對頭最後一擲失準時，即刻滿場飛周圍叫慶祝自己攞到冠軍嘅表情，乞人憎指數拍得住旺角金毛強。嗱！女神伊仙芭耶娃就唔同，當佢嘅主要對手最後一撐時，佢選擇擰歪面唔睇，然後當聽到反應知人哋失敗咗而佢贏梗時，佢只係望咗教練一眼，然後嘴角翹一翹，係咁多，呢啲咪就係風範囉，當伊仙芭耶娃再挑戰埋自己個紀錄之後，先至全場大合照，威盡。
所以我最近迷上FIFA，因為online打點輸都好起碼冇人見到，又可以幻想對手並非麻甩佬，點知玩咗一排，發現呢個世界上原來好多虐待狂，喂都已經俾你數咗十球八球啦，你都仲要單對單又扭橫又插花咁侮辱對手，所以唔好怪我使出撒手鐧，放心我唔係飛鏟狂踢，只係龍門攞住個波「揼波鐘」啫，輸咗場波但起碼贏咗控球時間，同巴塞一樣級數。
KEYMAN
now TV主持
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange