老實講，若論家品類型中最好用，又最有impact的一定係鏡。由於鏡有擴大空間的魔法，所以在寸金尺土的香港家居中，是極之適用的。不過，中國人對鏡有着風水學上的禁忌，而香港人一向都抗拒在牆上落釘，更因為對鏡可能會打爛有着莫名的恐懼感，所以要sell得出一面鏡是要花費很多唇舌的。極度不安的香港人買任何家品前，都會有很多憂慮？「呢張枱會唔會花㗎？」「呢張梳化會唔會坐扁㗎？」「木地板上用有轆的椅會唔會壓到有印？」我真係好想問番個客：「你會唔會終有一日衰老呢？」這個世界上所有產物都會有損耗的，重點是你怎樣去用。除非塊鏡有一定的size，否則它的重量不是太substantial。如六呎高全身鏡，用上拉爆螺絲釘已經足夠。而不想落釘，也可將它倚在牆前扮有型。而清潔方面，只要用舊報紙沾少少水，直接抹就成，玻璃水也不需要用。
細數最經典的designer mirror，應該係Jacques Adnet在50年代為Hermes設計的皮帶圓鏡。因為這design太獨特，所以現代人都以Adnet Mirror稱它，反而唔會叫它Hermes Mirror。幾年前，丹麥廠Gubi重新復刻此設計，引起了頗大的迴響。亦引伸到另一個近期的設計Hay的Strap Mirror。Strap Mirror最大的賣點是用上silicone取代了皮帶的概念。視覺上 Strap Mirror與Adnet Mirror實是兩生花，但手感卻很不同，而價錢更差天共地；Adnet Mirror大概賣港幣七八千元，而Strap Mirror則只賣港幣二千多元。
鏡款其實每個時代也有不同的潮流，近期 design trend就勁煲摺紙（origami）美學。繼德國柏林工作室Halb推出了Mirror #180後，又有法國玩嘢品牌Marcel By發行Akte，Nymphe Mirror。先講Mirror #180的idea是在圓的180度摺一摺，咁就將平平無奇的一面鏡變了兩面「睇」。同時間兩個人用鏡便多了點私人空間。再者，若單純以裝飾為作用，這個鏡上，因有着兩個不同角度的鏡面，所以折射到家中不同角落的倒影。用家行過鏡前，就能感到顏色不規則的晃動，視覺效果是平面鏡不能做到的。而Akte，Nymphe Mirror則有異曲同工之妙，只係鏡面的摺位更多（企身鏡有五個摺面“facets”），亦有彈性可橫放或直放，坐枱或掛牆。金色特別版更鍍上24k金，貴氣十足。
香港地，夠膽用前衞設計的用家，實在不多。多面睇切割式設計鏡，過到你伴侶個關，都未必過到你阿媽嘅法眼。遇上此deadlock situation，我總會建議客人考慮Diamantini & Domeniconi的Butterfly Mirror（clock）。第一，此家品可一物二用，照鏡用又得，睇時間亦得。第二，這塊鏡係女性都like，簡直係女性殺手！點解咁殺，皆因個幾隻男性視為「鳥獸散」的蝴蝶，在女性眼中等同浪漫。加埋這些蝴蝶仔嘅安裝位置是D.I.Y的，女性通常都會覺得自己有taste，只要你話將這個「擺靚」嘅任務交給她，她一定會飄飄然並欣然接受。
若已經買咗塊普通款鏡，嫌無嘢睇，又想環保唔想扔掉舊的，不如在鏡上玩吓「花臣」。不妨用上荷蘭超玩味品牌Droog Design的Water Drops。這幾片自動黏貼假水珠，有如在鏡上加上幾滴淚水，為悶蛋的家居平添幾分古典憂怨美。
作者：招國偉@aluminium
（ http://[email protected]）
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24