經典合唱歌《心仍是冷》，當梅艷芳獨特的唱腔唱出：「看透了冷眼，心早慣沒有說感嘆，冷笑似四散，掩飾我夢裏的燦爛。」幾句歌詞便道出了合唱者倫永亮的心聲，是歌手也是知名的演唱會音樂總監，曾一度想放棄唱歌，幸得雷頌德鼓勵，才重拾對唱歌的熱誠，倫永亮今年舉行演唱會，適逢梅艷芳逝世10周年，能有機會與樂迷分享他的音樂，也可趁機好好懷念阿梅這位摯友。
撰文：胡比
現年57歲的倫永亮早年以創作歌手姿態入行，其後轉戰幕後，做唱片監製和演唱會音樂總監，是梅艷芳的御用音樂總監，近年開始為另一好友林憶蓮（Sandy）做音樂，倫永亮自言是個非常幸運的人，能夠以音樂作為事業，還能遇上好拍檔，今年還在伊館舉行「One Voice Ten Fingers 演唱會2013」，和大家分享他的音樂。
性格改變命運，開朗的倫永亮是一個非常有自知之明的人，他自嘲：「我唱咗20幾年歌，如果我成日諗點解我唔係張國榮，點解我唔係superstar， 咁就會好唔開心，大佬你照吓鏡先，我成日照鏡同自己講，聲色藝，我已經冇咗個色字，要做一個歌手，用乜嘢去搭夠，咪就係音樂做好啲囉。」
感謝雷頌德
憑着這種信念，倫永亮在音樂圈中站穩了腳，幕後工作如魚得水，但幕前還是差點運氣，更一度想過放棄唱歌，專心做幕後，但當他遇上雷頌德（Mark），一個後輩的鼓勵，又再次燃起當歌手的那團火，倫永亮說：「有次Mark幫Sandy做隻碟，佢同我講話我係一個好好嘅歌手，我呢類型風格嘅歌手唔多，佢真係好nice，如果係前輩同後輩講鼓勵說話係好正常，但從一個後輩口中講出嚟，就代表佢講真話唔係呃我，佢冇需要討好我， 我都想佢有一日成為我監製，因為Sandy都覺得Mark可以帶畀佢好多啟發，如果我一個咁奄尖嘅朋友，都講佢係最佳監製，就一定係。」
難忘梅艷芳
今年是阿梅逝世10周年，倫永亮和阿梅的默契和深厚感情，無人可以代替，提起阿梅，他顯得無限思念，他說：「I miss佢嘅所有，同佢合作得最多，開頭做呢個演唱會時，都冇留意係阿梅過身10周年，真係冇諗到，而且到目前為止，都冇話點聽到有活動紀念佢，雖然我唔想好刻意做，但都一定會做少少嘢去懷念吓佢，我都希望有人可以統籌做一啲紀念阿梅嘅活動，10周年係應該嘅，趁我哋呢班識佢嘅人仲在生，講真50、60年後可能冇人知道梅艷芳係邊個，𠵱家有好多𡃁仔都唔知阿梅係邊個啦。」眾所周知，阿梅為人有義氣，倫永亮體會最深，眼見她出心出力幫助後輩，如許志安、草蜢和何韻詩等，他直言：「冇見過一個人好似佢咁豪氣同有義氣，仲要係一個女仔，好似我咁，唔係佢話同我合唱《心仍是冷》，我都冇機會可以得到TVB十大金曲獎。」倫永亮表示娛樂圈能有一個人無分別心，如此兩肋插刀，實屬難得，他還說：「我睇到太多人問佢借錢，我都問佢點解會有咁多，個個幾十萬咁借，我同佢講你唔係銀行家，但佢從來冇怨言，我唯一見佢喊過一次，係喺錄音室，佢一嚟就喊，之後知道係為家事。」他不禁為好友心痛。
港歌有限制
近年香港樂壇總被人彈到一文不值，身為香港樂壇的一分子，倫永亮又有何評價呢？他坦言：「好多人問我，唔明白今時今日啲歌點解成日都跟唔上口，無可否認𠵱家歌嘅旋律係改變咗，冇以前咁順，聽一兩次就會記得，太複雜，歌詞又冇咁詩情畫意，以前會係借喻，好似月亮代表我的心咁，會知道個心境，今時今日就係chok呀！紅黑紅、紅紅黑，乜嘢叫紅黑紅、紅紅黑？乜嘢係軟雪糕呢？我記得有次同霑叔（黃霑）傾偈，問霑叔𠵱家啲歌講乜野嘅啫，霑叔話每10年就有一個潮流，其實冇對冇錯，就好似時裝，每個潮流轉變都唔可以制止同阻擋。」他非常認同，只因今時今日的歌曲歌詞太過地道，港式歌令音樂發揮有所限制。
倫永亮昨日到電台宣傳將舉行的演唱會，他表示於演唱會中將會有跳舞演出，談到前晚首次排舞時，他笑言：「噚晚排咗兩個鐘，頭一個鐘排咗唔少高超舞步，但之後排舞師好婉轉咁改咗啲舞步，改完係好少少！」倫永亮又透露正為演唱會減磅，現在三星期減了6磅的他，自爆前晚練琴時忍不住口偷食：「平時有營養師望住，噚晚就偷食咗半磅麵包。」
場地提供：香港銅鑼灣皇冠假日酒店KUDOS
化妝：Jovy of MAKE UP FOR EVER Academy
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24