馮寶寶、黎小田、徐小明同石修一班童星出身嘅藝人，噚日去到西灣河電影資料館，為名為「童星．同戲」嘅回顧展主持開幕禮，展覽會一直去到11月初。已經有一段日子冇喺幕前演出嘅馮寶寶話，會先出一本自傳講自己嘅童星生涯，之後會參與兩部電影演出，佢話：「自傳要等出年3月得閒至寫，跟住會同牧師去耶路撒冷拍攝，仲有兩套電影已經接咗，一部係高志森，另一部係新女導演。」
寶寶姐話今次肯拍新導演係因為對方嘅誠意，親身攞劇本到馬來西亞檳城搵佢，仲話今次嘅片酬會用分賬形式，寶寶姐話：「香港真係好落後啦！人哋荷李活一早就用分賬。」
「啲武師唔係盲就跛」
對於劉家良遺孀翁靜晶追邵氏舊債，佢話：「人哋有九大武館做佢back up，邵氏夠唔夠膽唔畀？人哋都係用嚟幫班武師，啲武師個個都受過傷，𠵱家唔係盲就跛，邵氏賺咁多畀番啲出嚟都應該。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！