呢個暑假關於曼聯（圖）嘅新聞，除咗朗尼又話走又唔走，同埋法比加斯、費蘭尼、巴尼斯等等轉會新聞外，都係關於新領隊莫耶斯。周日社區盾2:0擊敗韋根，莫耶斯初步係pass，不過仲有嘅英超同歐聯，等緊佢考牌。
曼聯英超首戰對史雲斯贏唔贏到，其實同嗰日尹佩斯有冇料到劃上等號。曼聯社區盾全場有5次射門機會，其中尹佩斯2次中框，全部演化入球，而韋碧克2次射門當中1次中框，就被韋根門將卡臣撲出。
尹佩斯英超連爆兩季，先後喺阿仙奴同曼聯拎神射手，個人啱啱先踏入30歲，季初比賽應該冇咁快打殘住，講真韋碧克嘅把握力大家心中有數，唔會有咩期望，不過莫耶斯係亞洲之旅就收收埋埋查維亞靴南迪斯同香川真司，等佢地唞足，開季先輔助尹佩斯；始終季初波默契好重要，曼聯仲咬到費Sir老本，暫時唔會太難睇。
史雲斯有歐洲賽負擔
升班馬第2季往往最難捱，史雲斯上季不單排名更高，仲贏埋英聯盃可以打歐霸盃。不過對中小型球會嚟講，歐洲賽係糖衣毒藥，莫耶斯帶愛華頓時拎過歐聯外圍賽資格，就幾乎搞到降班。史雲斯兩鬥馬模1勝1和輕鬆晉級歐霸盃附加賽，會唔會惹埋歐洲賽後遺症，對曼聯嘅英超開鑼戰可以略知一二。文：牽牛
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24