今日特區亂局，幕後導演功不可沒。英雄片曾幾何時深入民心，若果天下太平，英雄又何來大顯身手機會呢？所以香港一定要有敵人，冇就要製造出來，將人民內部矛盾演變成敵我矛盾，將裂隙擴大，正是厚黑學招式補鑊法，明明隻鑊冇咁裂，工匠檢查時專登敲大裂口，咁樣先至會幫襯你補鑊。
死咬林老師，動員退休及休班警員上街，搵元朗社團人士站台護航，所有橋段都挑戰香港主流社會底線，但去到咁重口味，唔係人人頂得住。導演當然係梁振英，至於劇本邊個寫，只要由新界社團聯會入手，就可以將近年愛字堆湧現，古惑仔挺梁理出頭緒。
破壞政治道德底線
問題呢齣戲觀眾預期反應剛剛相反，重口味驚慄片不但吸引唔到捧場客，口碑極差，噓聲四起。因為成齣戲斧鑿痕迹太深，場面設計差，演員演技浮誇之餘，茄喱啡也爭住搶戲，編劇導演品味也實在過於低俗。大家都知由古惑仔護航，示威不成反示弱，顯露特首內心虛怯。更重要係畀中央睇到梁振英根本無人可用，政治基礎極之薄弱，直情危危乎。
董、曾二朝一樣落區，建制派站台護航，泛民場外衝擊，冇乜太大分別。但不論政治形勢如何，點都唔會想到用社團中人護航，政府始終有政府尊嚴，有底線。今次元朗社團高調參與政治，不怕傳媒與陽光，正正打破咗政府及市民嘅政治道德底線，立法會議員有責任調查清楚，梁振英有否參與動員社團人士，查實若無其事，便還他一個公道。
警察與黑社會同時被動員參與政治，香港已逐步變成第三世界城巿，非洲前殖民地獨立後，民選政府也好、獨裁政府也好都用黑幫、退休軍人及警察去對付、滋擾、恐嚇反對派，更極端嘅就令反對派政客、人權分子無聲消失。唔係危言聳聽，一旦打開門放出妖魔後，要重回文明政治將十分困難。香港亦唔係大家所認識嘅香港。
政治唔可以毫無底線，北京由八十年代籌劃回歸，一路以來都唔會用社團人物去參與政治，多年來與民主派、支聯會角力，也未曾動用過社團去對付支聯會。
如果真係有人想製造群眾騷亂及街頭衝突，以鞏固自己地位，等如將北京擺上枱。若中央坐視當前危險局面不理，就證明兩個周日警察與社團輪流晒馬事件，幕後導演不止一人。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange