今年美股屢創新高後，今個禮拜出現較像樣嘅調整，估計屬於大漲小回格局。至於呢個禮拜最矚目嘅消息，個人認為係美國著名投資者伊坎斥資10億美元掃蘋果股份呢單消息，事關伊坎向來無寶不落，俾佢睇中嘅公司，通常有上升潛力，但管理層往往就冇好日子過，大家剝定花生等睇好戲。
都唔知係錢多定市旺，除咗伊坎，近排其實好多大鱷都有動作，例如沽神約翰保爾森，近日竟然做程咬金，搶購美國著名鋼琴生產商Steinway，加上今年美國企業上市活動係近幾年最旺，反映個市應該仲未有咁快玩完。
講返匯市，歐洲近日續有好消息，歐元區上季終於守得雲開，擺脫長達18個月嘅衰退局面，上季經濟錄得0.3%增長，好過預期少少，主要多得龍頭德法兩國經濟有改善，其中法蘭西嘅增長有0.5個巴仙，連衰足十季嘅萄葡牙亦浮返水面，實屬可喜可賀。至於歐洲係咪從此見月明？市場似乎就咁係咁睇啦，事關荷蘭、意大利同西班牙仍衰退緊，加埋歐洲12.1%嘅失業率未有改善，成2,000萬人冇工做，所以即使近排數據唔錯，歐洲佬自己亦唔係咁睇好。好似上個禮拜，歐洲央行就將今年區內增長預測下調到負0.6%，明年嘅增長預測亦降到0.9%。
事實上，雖然呢幾個月歐洲方面算風平浪靜，冇歐豬出事，但其實大家心知肚明，只係班大鱷近月做好友搵食，對歐債危機隱憂視而不見，只要單邊炒市到咁上下，佢哋隨時會炮製話題掉轉做，尤其是踏入年尾係多事之秋。
後市變數多 中線利美元
遠嘅唔講，聯儲局下個月18號議息已經係市場頭號焦點，無論伯南克決定退市定唔退，個市都可能大上大落，而儲局議息後幾日嘅22號，就輪到德國舉行大選，雖然最新民意調查顯示，默克爾領導嘅基督教民主黨，支持度拋離對手社會民主黨逾10個百分點，如無意外總理默克爾可成功連任，但世事無絕對，萬一德國政壇要執位，在群雄無首的情況下，歐盟內部矛盾可能加劇，歐債之火隨時翻燒。
其實，歐債危機根本未拆彈，IMF早前就估計希臘出年又要撲水44億歐元，意大利2月大選冇政黨壓倒性贏出，看守政府唔知可以捱多幾耐，加埋萄葡牙反對黨反緊縮，隨時都會爆出新火頭，差在幾時出事而已。
美匯指數本周曾跌到七個月低位，歐元升到1.34美元邊緣阻力幾大，但由於美元弱勢短期可能持續，歐元一旦突破1.34美元阻力位，有條件升多一轉，但以基本因素計，歐元要去返年初高位有難度。
基於儲局下月可能縮減買債，加上德國舉行大選等不明朗因素，中線可能對美元有利，建議投資者等待歐元升至1.35美元附近開始造淡。
奇兵
本欄逢周五刊出
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24