火箭林書豪周三朝早返到台灣，即時馬不停蹄咁出席活動，接受傳媒訪問。佢周四一早仲將早前拍好嘅短片，放上YouTube，大晒自己新「紋身」畀大家睇！出名大細路嘅林瘋，之後去咗花蓮同小朋友玩遊戲，仲玩到差啲甩褲！
林瘋連續3年返台灣，前兩次冇咩點講中文，但係今次就完全唔同；周三記者會，林瘋9成時間都係用中文回答問題，睇嚟有下過一番苦功。林瘋仲大爆隊友柏臣斯遲啲都會到台join佢，兩個大細路一齊玩轉寶島！
「你變咗喎」短片博like
林瘋星期四喺YouTube上載咗一段短片，主題叫「You've Changed Bro（大佬，你變咗喎）」，仲請咗一班老友幫手。短片話林瘋經過呢幾年歷練，個人唔同咗，搞到個個都唔慣；就連佢苦練左手，對住隊友夏登用左手上籃，都俾鬍鬚佬發晦氣話：「你以前唔會用左手，大佬，你變咗囉！」。
片尾林瘋返到屋企幫瘋媽煮飯，亮出右手嘅「改」字紋身，即時俾瘋媽用鑊鏟打；瘋迷唔使驚訝，林瘋個紋身唔係真嘅。呢個「改」字，其實係佢細佬幫佢用箱頭筆畫；林書豪喺片尾花絮講製作過程時，仲係咁嗌痛，搞到細佬笑到冇氣。
花蓮玩遊戲險甩褲
之後佢去咗花蓮，到一間教會同小朋友玩遊戲。呢個大細路同小朋友玩「麻鷹捉雞仔」，不過唔知係咪因為條褲太鬆，佢玩得太開心搞到差啲甩褲，好彩佢及時拉得切褲頭，唔係喺班小朋友面前露底就唔好啦。另外，熱火「鳥人」安達臣近日都到咗台灣，仲帶埋有台灣血統嘅未婚妻嚟，佢仲好親民咁主動同球迷合照㖭！
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24