香港病危，即使未斷氣，政府腦幹早已死。大話精特首，施政變復仇；土共助暴君，黑心當淨心；舉報要賠罪，盲目撐警隊；江湖人做媒，晒馬反集會；時光倒流到67，同胞勿近what the fxxk。
亂世港人不再笑，然而三名教育學院三年級學生藉着今年2013年國語諧音「愛您一生」，跑到中環開壇擺檔，拍照捕捉市民燦爛笑容。
記者：李家希
攝影：中環特工隊
林慧思老師仗義爆粗，三名準教師Kelvin丶家駒和Jeffrey也哀香港命途多舛，有天靈光一閃，發現港人只有在拍照時才會笑，於是把心一橫讓大家笑個夠，打從三月開始，透過相機留住歡笑一刻。
每逢假日，三人總是帶着古老的寶麗萊即影即有相機，走遍中環舊區尋找笑容，景物懷舊，相機亦老。這天來到石板街，Kelvin和家駒打開行李箱，拿出黑白色的「香港快閃」招牌高高掛起，Jeffrey就掏出相機，四處睇位。
開檔不久，招牌惹來了六丶七個年青人注視，Kelvin主動出擊，游說他們拍照，頸掛相機的Jeffrey亦不閒着，向這班青年人推銷：「其實我哋有個理念，呢個係愛你手語（用手比劃），我哋用2013年，國語諧音『愛您一生』概念，同埋開心嘅笑容。呢個手語係我愛你咁解，不如用呢個好唔好呀？」
一眾客仔被打動，舉起愛的手語，泛起笑容，Jeffrey舉起相機，調校焦距，再按下快門，「叱吒」一聲，相紙從相機底部彈出，一分鐘過後，藥水乾了，揭開相紙，黑白相片呈現眼前。數碼新一代慣用手機拍照，初次領教陳年舊機的威力，打從心底裏笑出來，說：「好正囉！用一種特別手法，黑白相，影低香港唔同景點，係有一種特別感覺出到嚟。」
鎂光燈雖然一閃即逝，留下的照片卻經得起歲月考驗，當初三人湊合一萬元，在九龍城一家二手相機舖買下這部寶麗萊，總算值得，「呢部相機大過我，係一部有好耐歷史嘅機，影出嚟嘅相好有一種懷舊味道，我覺得有個hard copy揸住喺手，個感覺實在好多，會靚好多，十年八年後睇番都有味道囉」，Jeffrey說。
別人笑我太天真，我笑他們中計了，本來就是要你笑嘛，一名男途人說：「佢哋咁做，我唔會覺得好戇居，好多人都有自己夢想，有一種理念要表達出嚟。」另一名女大學生也認同：「冇話儍定唔儍，自己希望做到樣嘢，想去做就得啦！」家駒則道：「屋企好支持我咁做，冇反對過，佢覺得我𠵱家仲後生，後生應該搵自己嘅理想、自己鍾意嘅嘢去做。」
香港地做好人好事，總要面對金錢掣肘與政府阻撓。即影即有相紙供應量頗為波動，價錢亦反覆不定，作為學生，實在不能每張照片都免費送人，惟有收回每張成本20元；遇上草根基層，則分文不取。
做好事 卻遭食環阻撓
Kelvin還記得有一次，一名長者過來想拍照，「有個老人家坐輪椅經過，見到我哋個黑白招牌旁邊啲相，話好靚，我見佢衣着好基層，嗰日佢話自己90大壽，好耐冇影過相，我哋聽到佢一講，即刻二話不說就同佢影，仲將張相免費送咗畀佢，佢好鍾意張相，我哋三個睇到都好開心」。
食環署不問理念，一見檔口便認定他們是小販，家駒說：「佢哋曾經多次阻止我哋，叫我哋執嘢走，其實最大問題係佢哋囉，普羅市民都支持我哋，我希望日後佢哋唔會趕我哋走，咁就好喇！」
中環特工隊爆料熱線
WhatsApp：9499 3777
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange