擅拍寫實愛情片的葉念琛，不經不覺已儲落一批觀眾，明年是他做導演的第十個年頭，心裏一直有個願望，可以拍一齣嚴肅的電影。新作《第一次不是你》注入了葉念琛的真實故事，講述一段帶有遺憾的愛情故事，他更大膽起用新人馬志威、蔣家旻做主角，在葉念琛引領下，馬志威直言戲假情真：「嗰一刻真係愛上咗蔣家旻！」
撰文：溫敏芝
葉念琛由04年的《甜絲絲》，陸續而來的《獨家試愛》、《十分愛》，都以寫實的愛情片掛帥，今年葉念琛新作《第一次不是你》有別以往作風，起用一張白紙的28歲馬志威（Edward）及23歲的蔣家旻（Angel）擔任男女主角，劇情講述蔣家旻飾演的阿寶，16歲時，為救腎病母親出賣自己做私鐘妹，馬志威飾演她的初戀情人阿強，卻幫不到她，惟有接受和支持。
用新人貪新鮮
日前葉念琛、馬志威與蔣家旻接受本報專訪，葉念琛坦言就是喜歡兩人的清新脫俗，他說：「呢個古仔諗咗七、八年，但一路未有時間拍，戲裏面有啲情節係我親身經歷。」葉念琛表示起用新人不會有票房壓力，任何一個數都是一個紀錄，換轉是大明星有往績，反而壓力更大，他說：「𠵱家個人開始老咗，要諗吓係咪要畀多啲新面孔觀眾，為工業做多啲嘢。我拍周秀娜、羅仲謙時，佢哋都係啱啱起步，𠵱家見佢哋好好。」
葉念琛表示今次也花了一段時間試鏡：「佢哋兩個好得意，唔係最主動嘅面試者，唔係好想要呢份工，但呢樣我反而喜歡，同古仔嘅男女主角都好草根，冇機心好相似。」他更大讚蔣家旻演戲天份高，由16歲演到26歲很難演，馬志威則是一個很勤力的人，比起化妝、劇組更早到拍攝現場準備。
揼本買片尾曲
一向注重電影歌曲的葉念琛，今次選了鄭伊健的《愛情歲月》做片尾曲，他說：「呢首歌對部戲好重要，今次仲用咗比做新歌更貴嘅錢，買番呢首歌版權，我畀部戲老闆晶哥（王晶）睇時，我都同佢講如果首歌真係太貴，不如我夾啲，晶哥即刻話好鍾意呢部戲，話首歌當送畀我，成件事變得好圓滿。」
新丁馬志威在戲中與蔣家旻有激吻戲，他笑說：「唔尷尬喎，拍之前導演捉我哋兩個傾偈，走嗰陣，Angel同我講好驚，我仲叫佢唔使驚，作為男仔我唔可以驚，之後都好順利完成。」葉念琛笑說：「Ending嗰場我睇到佢哋有戲假情真，嗰樣嘢呃唔到人，可能咁啱場戲係臨近煞科，代表佢哋好快分開，而阿強同阿寶嘅關係又要畫上句號，將演戲同現實混埋一齊。」
場地提供：觀塘帝盛酒店
化妝：Kayte Fung（馬志威）
髮型：Alex So of POP 8
服裝：izzue of I.T（馬志威）、Majestic Legon（蔣家旻）
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！