紅褲仔出身、自言「由童工入行做到花甲之年」嘅八達通行政總裁張耀堂（Sunny），明年1月約滿，就正式退休。呢位獲市場同傳媒人一致稱許嘅好好先生，雖然前排仲要出嚟，為八達通扣多咗錢嘅事件滅火，但佢話決定退休，同工作壓力完全無關，「做咗（銀行金融業）40年喇，遇過唔少風浪」，趁明年初約滿，正好係時候認真考慮，人生步入另一階段。
等收特製八達通卡
Sunny出年就滿60歲，佢讀完中六就投身社會，名副其實係由低層做到CEO嘅賓架，19歲就投身銀行界，1973年考入邱德根家族嘅遠東銀行，之後喺花旗、道亨、星展、Visa國際同八達通等多間銀行、金融機構工作，服務最長嘅寶號係花旗，效力26年。
不過正如佢講，幾十年賓架生涯，總有唔少風浪。
2004年10月，星展香港爆出世紀大烏龍，分行因內部裝修，居然錯誤銷毀83個客戶保險箱，當做廢物壓成廢鐵，時任董事總經理嘅張耀堂，代表銀行多番公開致歉。前年佢接棒八達通，亦係燙手山芋，前行政總裁陳碧華，因出售客戶私人資料而落台。
Sunny話，加盟八達通前，已好清楚公司面向公眾嘅性質，呢兩年佢同團隊相處極佳，「呢度有個傳統，每次有同事離開，都會整張特製八達通畀佢」，佢都等緊收呢份禮物㗎。退休首個願望，就係想放個悠長假期，旅行期間唔使邊睇風景，邊處理電郵，諗起都開心，等唞夠先再考慮其他志趣發展。
李華華
mailto:[email protected]
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24