梁詠琪（GiGi）前年閃嫁拍拖半年的西班牙籍猛男Sergio，成為一時佳話，這段異國情緣本是引人入勝的亂噏話題。不過就算再美麗再傳奇的童話故事，在倪匡與妻子的半世紀婚姻之前，一切已變得微不足道。畢生只戀愛一次的他，在節目《亂噏24》中貫徹其衛斯理式瀟灑風，淡淡然道出其戀愛態度，被蔡瀾、黎智英（肥佬黎）盛讚為「絕等好男人」、「大情聖」。大俠不愧為大俠，直教凡夫俗子羨慕不已。《亂噏24》逢周四晚上11時播出，可在 http://bit.ly/appletalk24重溫。
撰文：馮國康
肥佬黎怕衰 見到靚女唔敢追
三位節目主持肥佬黎、蔡瀾和倪匡埋位前，已對面前又高又靚的梁詠琪讚不絕口，不期然想到其西班牙籍老公Sergio相當有福氣。茫茫人海，倪匡相當好奇這段異國情緣是如何萌芽：「點解會識？異國朋友，冇乜機會識，你又唔係住西班牙。」GiGi娓娓道出與老公的相識經過，總離不開一個「緣」字，她說：「其實我哋最尾個conclusion係，前世識囉。我去旅行，有個朋友都係嗰日先識，咁我先生係嗰個朋友嘅朋友嘅朋友，一齊傾偈咁就識咗。」
也許一見鍾情是童話故事才有的情節，但倘若當初Sergio沒有勇氣追求GiGi的話，也不能促成這段姻緣。就以肥佬黎為例，他自問不敢追求太靚的女人，他說：「我唔係驚娶咗個靚女，怕佢喺出面拈花惹草。你係唔敢，即係你覺得心怯。」蔡瀾笑笑口示意不認同。肥佬黎續說：「有啲人覺得好威，我覺得好要脅。我係真心唔覺得好威，係覺得好intimidated（威脅），係唔舒服，好奇怪。所以呢世仔從來未同過靚女出街，除咗我老婆！」原來是兜個大圈讚老婆靚！倪匡忍不住爆響口：「佢當年追佢太太嘅事，通行都知㗎啦！」
眾人嘻哈笑完一輪，肥佬黎回復正經，他認為追女仔，「一係得，唔得就走得」，緣份不可能強求，換來倪大俠高八度輕嘆：「追唔到㗎！」言下之意即是等女人上釣。肥佬黎沒好氣的說：「咁你都要表示㗎，好多女仔好怕醜㗎嘛！」倪回他一句：「鍾意你嗰陣時，佢唔怕醜㗎啦！」
倪匡一句「女唔使追」，將肥佬黎逼入窮巷，他在鏡頭前故作生氣的樣子實在太難忘，他說：「咁你都要表達㗎！唔會兩個人企喺度，突然間撞埋一齊，唔會㗎？梗有條友行先㗎？」倪大俠不慌不忙的回應，指當兩情相悅，便自然走在一起。肥黎佬不禁問起他的情史：「你呢世人拍過幾多次拖？」倪答：「一次囉！」黎追打：「其他嗰啲玩嘅啫？」倪答：「咩咩其他嗰啲呀？」邊說邊叮囑導演刪剪以上對話，又對肥佬黎說若老婆病發的話唯他是問！肥佬黎方知剛才笑話玩過龍，蔡瀾則依舊笑翻天。
大情聖倪匡細訴54年情
原本只懂儍笑的倪匡，提到太太時即嚴肅起來，因其太太精神不佳。蔡瀾向GiGi說：「我哋呢啲老朋友成日話，從來冇睇過一個先生對太太咁好。好浪漫㗎，幾十年都係咁。」雖然肥佬黎對此狐疑，但倪匡還是道出其妻的趣事：「佢病之後，好多記憶消失，好似細路哥一樣，好好玩！有時見佢扭吓計咁，好似重新談戀愛咁。」看似說得輕鬆，但現場人均感受到他對妻子的疼愛，倪續說：「我真係好無可奈何，冇辦法啦。佢經過好可怕嘅治療方法，全身麻醉後用電流刺激腦部，一次做二十秒，做咗幾次之後，佢開始噩夢中醒過來，但過去好多記憶都消失咗。」肥佬黎認為換個角度看，活到這個年齡，身邊有人願意這樣照顧自己，絕對是種福氣。蔡瀾則以「大情聖」來形容這位老友。
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24