莫耶斯首要處理邊個頂朗尼嘅問題。朗尼（白衫）上季大部份時間踢影子前鋒，攻入12球同交出10次助攻；有尹佩斯喺度，佢一個頂兩個，入埋朗尼嗰份都可以，但邊個助攻畀尹佩斯就係大問題。睇社區盾，莫耶斯用咗韋碧克去頂朗尼，效果係破壞有餘，建設不足，佢係勤力，但講到串連前場嘅進攻，同埋喺適當時候轉邊、放直線，韋碧克真係差幾皮。
雖然曼聯喺社區盾贏2:0，但全場只得3次中目標射門，就見到呢支曼聯組織能力弱。以往有朗尼喺禁區頂走出走入，中路組織好幫到手，𠵱家冇咗佢，就惟有靠兩邊出波。當然你可以話曼聯仲有香川真司，但香川至今仲未融入球隊體系，發揮唔到應有水準，唔敢期望太高。
拉菲爾受傷影響大
講番側擊問題，由社區盾得見，曼聯兩邊嘅情況係閘強翼弱，好多時翼鋒會內切或者作為誘餌，再由閘位球員殺落底線，或者衝入禁區，製造埋門威脅。不過，能做到呢樣嘢嘅閘就只得艾拉同拉菲爾達施華，而拉菲爾呢場踢唔到，曼聯就好似斷咗一臂，得番左邊嘅艾拉。另外，曼聯季前比賽有個問題，中場同防線之間拉得太開，當對手突破咗中場，就可以長驅直進；而防線就縮到禁區頂。唔知莫耶斯會唔會解決呢個問題？文：咖喱
相戀54年！倪匡向全世界說：「到現在這麼多年，還是這麼深愛太太！」
你都想分享一點甜蜜？立即重溫今周《亂噏24》！
http://bit.ly/appletalk24