女教師罵街之錄影，原來早已瘋傳，秘書V、記者C等等女士嘅家人，一早睇過，佢地話人人喊罵，啲阿媽阿婆尤其俾女教師嚇親，沙田陳太與家人睇完，亦一齊鬧女教師，話佢言行不當。講粗口呢樣嘢，左丁山係男士，當然有講過啦，但無意之中，原來發覺自己好遵守馬克吐溫嘅講粗口戒條（見八月十二日信報C1版），即係不在公眾場所或淑女面前講粗口，不火遮眼講粗口，不經常講粗口。讀中三時，左丁山唔知點解被編與女同學同位坐，背後又係兩位女同學，當時未懂爆粗戒條，幾句粗言字不離口，背後兩位女同學就用刨尖嘅鉛筆篤左丁山背脊，同位女同學就黑口黑面咁講：「Mind Your Language！」俾三位女同學「調教」咗一年，左丁山居然變成一個班上最少講粗口嘅男生。自此之後，從不在女士面前講粗口。嗰位專篤左丁山背脊嘅女同學現在係名媛，常在馬場拉頭馬，有時撞到就醒我貼士。
講番女教師嗰筆，梁振英為何要高調大聲講，要吳克儉提交報告？根據「教育條例」，教育局常任秘書長（現為謝凌潔貞）有權取消教師教席，如果「教育人員專業操守議會」有建議的話，不過議會有23名委員（選舉產生，再加三名政府委任委員），在今日環境之下，要議會達成懲處教師嘅建議，應無可能。咁吳克儉寫報告有甚麼建議呢，真係要煮死位女教師？
呢日飯局，大家對此議論紛紛，據讀過「Yes Minister」與「Yes Prime Minister」嘅退休法律界人士C講：「我唔知梁振英想點，但為咗香港好，為咗社會和諧，我有一條英國官場好橋俾梁振英、吳克儉參考。寫報告嘅結論會係：教師之街頭言論粗鄙，令人遺憾，有違教師專業形像，本應懲處，唯念及教師教學多年，受學生擁戴，又曾得行政長官卓越教學獎，教學方法與成效為教育界肯定，足為教學表率，不忍深責，僅建議該校管理委員會主席及校監向該教師給予口頭警告。如此這般，等因奉此，案情如此之下，梁振英收到報告，咪發表聲明表示接受教育局長報告，並呼籲全港教師站穩工作崗位，教育下一代，諸如此類……完了！」咦，有道理噃，大家都認為可行，可以大事化小，吳克儉要爭回民望，此其時也。