玄學師傅麥玲玲簽咗無綫藝員約後，一直都等緊拍劇機會，佢早幾日終於收到開劇通知，首次拍新劇《牛頭愛搭馬嘴》，會同歐陽震華（Bobby）、萬綺雯（蚊蚊）合作，玲玲師傅喺劇中係飾演蚊型雜誌社嘅老總，會同屬下「蝦頭」楊詩敏經常一齊去採訪新聞，所以同飾演警察嘅Bobby、蚊蚊都有對手戲，而佢就經常欺壓蝦頭。
4吋對撼42吋
講起第一次拍劇，玲玲師傅就興奮，因為可以同好戲嘅Bobby、蚊蚊、蝦頭合作，但美中不足嘅係冇感情線，佢話：「真係好可惜，冇呢啲員工福利，反而蝦頭都有得暗戀李思捷。冇感情線，冇得同蚊蚊爭Bobby啦，其實根本冇得爭，蚊蚊嘅42吋長腿冇得比，佢對腳長過我成個人！」
雖然蚊蚊有42吋嘅長腿，但玲玲師傅心口都有條4吋長嘅事業線，如果唔計腿，改為計事業線嘅話，蚊蚊就要輸個馬鼻囉！
因為套劇有咁多好戲之人，玲玲師傅話會搵演藝導師好友惡補番兩堂，至於度期嘅問題，經常要返內地做講座嘅玲玲師傅話，十幾廿萬一場講座成日都有得做，但演出機會唔係經常有，所以佢好多謝監製張乾文畀佢呢個大過戲癮嘅機會喎。
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！