小弟近期介紹嘅股份，都係「以人為本」，事後睇番啲股價表現不俗，證明呢種選股方法係work。
今日繼續，今次跟澳門猛人「街市偉」吳文新，睇佢隻奧瑪仕（959）。
呢位大哥近排終於靜極思動，上個禮拜中，奧瑪仕宣佈殺出馬交，進軍瓦努阿圖同北塞浦路斯，搞酒店同賭場。照計有得諗，睇吓小賭王何猷龍私人持股嘅凱升（102），一話要去俄羅斯開賭，股價由復牌嘅約4元水平起步，已升咗超過五成，再睇埋本身喺柬埔寨開賭、又話要進軍俄羅斯嘅金界（3918），股價同樣創新高，絕對係奧瑪仕「殺出馬交」嘅參考指標。
發展潛力不容小覷
奧瑪仕上個禮拜份通告話，會向澳洲Zagame Corporation嘅附屬公司，收購瓦努阿圖維拉港Grand Hotel and Casino全部權益，並計劃收購後申請博彩牌照，同埋喺酒店內經營賭場。
份通告出街後，market中人有褒有貶，不過，有個行家唔知佢係咪太忙好少出去玩（又或者冇地理常識），話瓦努阿圖「山旯旮」咁遠邊有人會去賭錢，就呢一點，小弟好唔同意。首先瓦努阿圖其實好近澳洲，集合超過80個島嶼，再講，近年好多大郵輪公司都睇中呢堆島嶼如世外桃源般嘅賣點，大搞由澳洲出發嘅航線，停喺對開海面度，畀遊客上島玩，約一個禮拜嘅航程，每日搭駁船去唔同嘅島嶼玩，不知幾爽，埋單都只係兩萬零蚊，捧場客多不勝數。
點解小弟咁清楚？因為睇完早前鄭伊健個旅遊特輯後，已經攞定晒資料為自己下次放大假做晒功課！
有咁多大郵輪公司肯搞呢條航線，證明瓦努阿圖係有旅遊發展潛力。再者，瓦努阿圖本身已經有兩間賭場，第一間係棕櫚賭博娛樂場（The Palms Casino），另一間係Club 21，如果冇人去，又何來兩間賭場？再以「街市偉」搞賭嘅資歷同經驗，有理由相信佢應該夠power將瓦努阿圖搞得更旺。
小弟咁講係有根有據嘅，大概十年前，正正係濠賭潮萌芽之時，「街市偉」就已經識得將氹仔新世紀酒店樓下個舊賭場，包裝成古希臘咁款嘅希臘神話娛樂場，𠵱家睇就梗係覺得有啲「娘」喇，但當年真係一時無倆，不過最重要係呢個場將奧瑪仕嘅身價短時間內膨脹數十倍。
既然「街市偉」靜咗咁耐，𠵱家再出手，應該唔會計錯數。而呢一刻更關鍵嘅係，奧瑪仕嘅市值只得兩億幾銀，連3、4億嘅殼價都未到，最啱玩併購或注資，同埋佢已經又合過兩次股，合到乾乾淨淨，而每股資產淨值（NAV）仲竟然高達5.1元，現價先得1.13元，值博率不俗，淨係博佢上返去年初1.6元水平，潛在升幅都超過40%，所以呢鋪「以人為本」抵博！
陳承龍
本欄逢周四刊登
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange