利豐（494）最危險的關口總算捱過咗，如果一如管理層所言，美國品牌業務（LF USA）唔再爆鑊，公司全年要回復增長，似乎唔難，短期亦毋須再抽水。不過過咗呢關，集團未來增長動力喺邊？採購業務仲有冇得搞？這些才是利豐具體要說服投資者的問題。
利豐過去幾年忙住做deal，到底仲記唔記得應該點樣去經營一盤生意？去年轟動國際的孟加拉多宗嚴重工業意外，暴露出當地工人權益被剝削的問題：如工資過低、工廠違規建築，甚至連火警鐘響，工人都被要求繼續留守車衫。
利豐曾向出事工廠進行採購，海迪聽利豐員工講，呢件事搞到利豐一身蟻，因為公司在選取供應商時，內部應該有一系列安全指引要跟從，如果真係按規矩辦事，呢啲血汗工廠根本無可能入到利豐的供應商名單。
上周《New York Times》做咗篇報道，詳細講解利豐近年和世界各地血汗工廠的關係，非常值得細讀。據報道，去年11月孟加拉工廠發生逾百人死亡的致命火災後，今年4月大批零售商坐低開會，研究成立基金賠償畀死傷者家屬。多名美國客戶拒絕注資，最後是作為代理人的利豐負責埋單，每位賠償，僅1,200美金。
有熟悉利豐的友人向海迪透露，利豐近日與其他美國零售商共同成立一個組織，負責調查孟加拉每一間他們有份採用的工廠。據講利豐派出的代表，竟是去年因LF USA爆鑊、而被撤職的前總裁Richard Darling。有咩啟示？大家自行解讀吧。
海迪
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24