阿爺經濟漸露𥌓光，放水態度轉積極，債重股肯定成市場新貴。今日推介嘅中海發展（1138），同噚日提及嘅熔盛重工（1101）一樣，屬債重一族，加上與經濟增長關聯度高，中短線皆具值博率。
中海發展主打中國沿海乾散貨運輸業務，貨物主要為資源類如油品及煤炭等，早前內地經濟弱過藥煲，集團首季錄得4.84億銀人仔虧損，實在非戰之罪。如今阿爺已為經濟增長保底，加上貿易數據在打假下仍有正增長，下半年業績肯定有睇頭。
波羅的海乾散貨指數今年以來累積升幅達44%，同期中海發展股價卻跌11.7%，嚴重背馳，配合市況轉旺，炒落後空間極大。由於航運業盈利仍未紮實，故用市賬率（PB）秤平貴更實在，中海發展現價PB 0.46倍，中海集運（2866）PB 0.72倍，中國遠洋（1919）PB 1.16倍，中海發展較同業分別折讓36%及60%，現價買中海集運，等於半買半送。
睇圖表，中海集運日線圖大圓底炒上，走勢靚絕，更成功突破250日線，由熊轉牛訊號明顯，係咁易用0.6倍PB做目標，可見5.11元，較現價3.92元有三成水位，屆時仍較同業平均PB折讓逾三成。
唐牛
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24