呢個星期除咗英超，西甲都開鑼。比較英超群雄爭霸，西甲就簡單得多，我諗好多球迷都覺得，冠軍唔係巴塞隆拿就係皇家馬德里。皇馬揭幕戰主場對貝迪斯，亦係教練安察洛堤（肥安）西甲第一擊，《馬卡報》就估計佢嘅預計正選陣容，最令人意外係巴西中場卡斯米路打正選。
新仔撼贏沙比、基迪拉
肥安今季取代摩連奴成為銀河艦隊教練，西甲首戰就要喺巴拿比奴主場出擊；雖然只係面對中型班貝迪斯，3分應該冇咩難度，但點都要好好睇睇大炒番場。作為皇馬「隊報」嘅《馬卡報》，周二就列出肥安預計陣容，排個4-4-1-1陣，表面睇好似好保守，由基斯坦奴朗拿度（C朗）擔任前線自由人，支援前鋒賓施馬；不過中場線4人，奧斯爾、莫迪歷同新兵艾斯高都係攻多過守，只得防中卡斯米路叫做主要擔任掃蕩工作。
其實皇馬防中都唔少，好似沙比阿朗素同基迪拉，今夏又收購咗伊拿拉文迪，不過肥安咁睇好卡斯米路呢位由巴甲聖保羅外借回收嘅戰將，睇嚟對呢位21歲𡃁仔好有信心。
巴利拒為皇馬粉絲簽名
皇馬陣容已經夠晒強，不過繼續希望收購熱刺中場加里夫巴利；有傳因為咁，搞到球隊首席巨星C朗備受冷落而好不滿。有傳C朗同皇馬傾緊續約嗰陣，向主席佩雷斯施壓，要求皇馬唔好買巴利，佢先肯續約，直頭有你冇我咁款。
不過皇馬球迷都好似準備定迎接呢位威爾斯快翼，喺英國卡迪夫讀書嘅皇馬西班牙籍球迷阿比爾，日前仲特登去到威爾斯國家隊訓練營，搵巴利簽名。起初巴利都好開心接咗支筆，點知之後佢見到呢位球迷着住皇馬衫，就驚俾傳媒炒作，即刻還番支筆畀球迷兼拒絕簽名。
雖然巴利「雙手說不，但個心就好誠實」，據報佢完成國際賽後，周四返到熱刺，就會同管理層攤牌，仲口口聲聲唔會再代表熱刺比賽㖭。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange