近年聽到分析員被裁就多，玩音樂椅就真係好少有，聽聞野村、摩根大通同瑞信呢3間外資證券行，近月都有資深地產分析員另有高就。
摩根大通原先睇中港地產嘅阿頭Lucia Kwong，早幾個月離開，去一間地產商做投資業務，由sell-side轉buy-side。摩通於是向瑞信挖角，搵咗出名勤力、入行21年嘅證券研究部董事梁啟棠（Cusson）過檔。
Cusson主要睇地產同和黃（013），佢等長實（001）、和黃本月1號公佈業績，寫埋份報告先遞信，𠵱家放假中，應該11月去摩通返工，到時更上一層樓，睇晒亞洲區地產同綜合企業股，職銜升呢做董事總經理。
野村地產分析部阿頭Paul Louie遞咗信一段時間，聽聞會去英資行巴克萊返工。
老實講，自從十幾年前，有卓百德同林奮強呢兩位真係有江湖地位嘅星級地產分析員之後，𠵱家都冇乜呢類星級分析員，經歷過幾次股災、負資產，能睇通個市嘅就更加買少見少。
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24