杜汶澤近年同蔡卓妍（阿Sa）有唔少合作機會，大家又係同一間公司，更加係經常見面，不過其實之前佢哋曾經為鄭中基而反目。最近阿澤接受內地《南都娛樂》周刊訪問，大方講當年同阿Sa嘅恩怨同點樣和好做番好友嘅經過。
阿澤話：「有一次鄭中基就飲到很醉，阿Sa打電話來叫他回家，我就覺得她很煩……我當時一手搶了鄭中基的電話講粗口罵她：『八婆，你不要再打電話來啦！鄭中基今晚是不會回家的啦！』從此她就很憎我，見到我都當看不見我。」後嚟阿澤簽咗英皇同阿Sa同一間公司，阿Sa問經理人霍汶希（Mani）點解要簽呢啲人，可見阿Sa幾唔妥阿澤。冇耐之後阿澤信佛，覺得冤家宜解不宜結，有次佢同阿Sa同機前後排坐，佢主動同阿Sa講：「對不起。」阿Sa即話：「哎呀，你不用這樣。」佢哋就咁化解一切成為老友記。
爆Mani產後冇記性
而阿澤同阿Sa主演嘅新戲《超級經理人》下月就上，之前佢哋一齊做訪問，問到佢哋有冇諗過做經理人？阿澤話曾帶王敏奕簽英皇，但最後解約收場，佢認為簽藝人好似買馬，眼光最重要：「有錢咪買熱啲，冇錢咪買冷啲。」阿Sa仲爆Mani生完BB後，記憶力比以前差。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！