港股打風冇市，趁機做下功課，望吓圖發掘潛力股，未嘗不是一件好事。殘股近日on fire，航運股全線起錨，但據同事引述廠家表示，第三季係傳統旺季，但歐美定單並不理想，相信都係等9月，睇吓伯南克會唔會啟動退市。
如果屆時冇動作，相信會有一輪急單潮，以趕及於感恩節及聖誕節付運，到時運費相信會加得幾急，利好航運股表現，上游股廣州廣船（317）可以吼實。
全球航運業陷入多年低潮，新下水貨輪大減，如今美國經濟穩步復蘇，強國PMI亦見底回升，配合歐洲及日本的量寬措施，明年貨運需求應會重新起錨，造船業將率先受惠。上周國務院推出船舶業扶持措施，協助加快行業整合，貴為行業龍頭的廣船將可獲益。
為壯大實力以迎接行業上升周期，廣船6月底公佈，將發行25億元人仔H股，向中船集團收購華南最大船廠──龍穴造船60%權益。廣船H股市值目前僅15億港元，是次收購可謂大龍鳳！大股東更自掏腰包認購當中八成股份，可見信心十足，由於收購通告表明，配售價將是股東大會前20日的90%至110%，炒上批股應無懸念。
睇番走勢，廣船近日由6.50元起步，已升穿並企穩於前高位7.30元水平，上日報7.55元，創收購公佈後新高，應是大炒前的最後上車機會，短炒先睇10蚊，未來一年絕對有力翻一番。
魏力
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange