時間：周三 地點：九展
有時喺fb入面，用同一個名都會搵到好多唔同嘅人，大家有冇試過搵金妍兒？原來呢個名唔止屬於冰上精靈，仲屬於另一位健美好手。日前呢位大隻金妍兒就現身九展。南韓首爾人，都係有一把長髮，同樣美人胚子，只係呢位金妍兒手瓜起𦟌，今年30歲，仲係南韓健美隊教練㖭。喺佢嘅fb入面，有唔少打扮得靚一靚嘅相，確係幾索。
與金妍兒同名同姓
大隻金妍兒噚日紮起一頭長髮，帶住南韓健美隊到九展參加國際健美錦標邀請賽，佢話出年會以運動員身份再來香港，大家有眼福啦。曾跟父母喺北京讀中學嘅金妍兒，用一口流利普通話回答，原來金妍兒呢個名畀咗好多困擾佢：「我在網上打自己名字時，一大堆花滑的金妍兒先走出來，我的資料總在她下面，最慘試過有人以為我是花滑金妍兒，會有失望的表情，我都頗生氣。」
唔好睇金妍兒𠵱家黑黑實實，原來8年前開始玩健美前，身高1米62嘅佢，連42公斤都冇，佢話：「我覺得女孩子有肌肉也是很美，很性感。現在的韓國女明星都太瘦，不好看。」講到健美嘅韓國女孩子，仲有另一位叫池妍玉，個樣不但同金妍兒有得揮，仲大隻好多；同樣叫妍妹嘅佢仲上過江蘇衞視《非常了得》節目，好鬼出名。不過睇慣南韓美女，睇到佢哋個樣似韓星，手瓜咁大隻，硬係有點唔慣。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange