李氏力場失效，8號風球高掛12粒鐘，除咗令到一班經紀唔使返工，港交所（388）班董事亦都唔使晨早走去開會，佢哋份中期業績於是就公佈唔到嘞。反而國泰航空（293）早講明風雨不改，點都會如期喺噚日開業績會。兩隻都係藍籌，點解做法可以咁唔同㗎呢，仲要係港交所喎。
上市公司公佈業績前，要董事局先開會批准盤數同派息先得。港交所前晚已經出通告講明，如果噚日早上8點仲掛緊8號波或黑雨，佢哋會遲一日公佈業績。聽聞佢哋9點開董事會，咁嘅安排，應該係避免12位尊貴嘅獨董冒住風雨去中環開會；亦唔使市場一路等落波一路估佢唔知出唔出業績。
國泰雖經常有航班延誤，但公佈業績就風雨不改。佢哋堅持嘅原因好簡單，太古A（019）遲國泰一日公佈業績，國泰延期，太古亦要順延，好幾位董事專誠從倫敦飛來開會，大家都唔想延期，要做亦實做到。
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24