噚日全民罕有享有半日颱風假，仲唔係因為超人撤資，搞到造價最貴嘅李氏力牆穿窿？呢個雖然只係Gag，但都為冇市開嘅日子，帶來少少歡樂。
放假要醫肚，杯麵可以話係懶人恩物，其中日清嘅更係唔少人至愛。
據《日經》報道，原來日清喺香港推出12種口味杯麵，最受歡迎前4位分別係海鮮味、香辣海鮮味、咖哩海鮮味、XO醬海鮮味，呢4種味佔總銷售額7至8成。
日清當年為打入沿海市場，所以特別推出海鮮味，於是成功扑中。
當然，內地有13億人口，日清亦都想於內陸加大市佔率，而未來重點，會力谷嘅口味就係牛肉味。
日清所用嘅本地化策略，講求零活變通。不過，KFC母公司百勝就唔多識用呢招，7月份內地表現仍然係一鑊粥，同店銷售大跌13%。當然公司可以賴係被「速成雞」事件、禽流感拖累，但實情係內地剛經歷140年以來最熱7月，好似麥當勞、星巴克都力谷凍飲、雪糕產品，但KFC呢？仲力銷熱食。
公司對市場的需求變化反應咁慢，業績差都真係打死無怨。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange