估唔到香港俾689振英社呢個新字頭黑氣壓頂嘅時候，連天文台都被黑影籠罩！天文台一部監測天氣嘅攝錄機，噚日朝早，突然間畀一個「黑影」隻「手」遮天，卡住咗個鏡頭成兩個幾鐘。嘩，連天文台都搞，唔通黑色梁粉想香港風雲色變？大家唔使驚，綜合市民同專家分析，相信只係一隻蜥蜴仔喺颱風下「作樂」唔係「作惡」！
蜥蜴黑影膽大遮天
打風期間，打工仔梗係最關心天氣變化。唔少市民發現專責遠眺新界西部、位於嘉道理農場暨植物園嘅攝錄機，噚日朝早11點半至2點一直被「黑影」籠罩，遮住少少天色。細心研究下，唔少網民覺得係一隻蜥蜴仔。有人覺得乜蜥蜴仔咁奀皮，打風都四圍走？有人叫佢小心，唔好被風吹走。
「受害人」天文台都有留意黑影喺鏡頭前潛伏一段時間，估計係四腳蛇之類。雖然蜥蜴仔咁「膽大遮天」，但天文台話冇對機器造成任何影響。
八方問過香港兩棲及爬蟲協會行政總監段國樑，佢話單憑張相入面見到嘅五隻腳趾仔加上體積，推斷呢隻係一隻壁虎、即係平時大家喺屋企見到嘅四腳蛇。佢話壁虎有成過千品種、分為五個亞科，身長由4厘米到40厘米不等；而壁虎概括嚟講，係蜥蜴嘅一種。唔知一哥曾偉雄見到蜥蜴仔親身演繹佢嘅黑影論，會唔會出動防暴隊捉佢呢？
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange