【亦師亦友】
一個是自言讀書不多的銀行家，一個是芝加哥大學經濟系畢業的智多星，在聯交所共事三年令他們變成亦師亦友的知己，袁天凡說，在利國偉身上學曉處世經驗的可貴，面對「底線」也不退讓。
袁天凡直言，當年打動到他放棄高薪厚職過檔聯交所當行政總裁，其中一個主因是利國偉出任聯交所主席。當時利國偉位高權重，在美國讀書的袁天凡自言「初生之犢不畏虎」，滿以為「揸住道理就大晒」，但與利國偉工作後，另有體會，「阿Sir係一個好踏實、好低調、好平易近人嘅人。」袁天凡當時在交易廣場工作，不時跑到一街之隔的舊恒生總行找利國偉密斟，不少決策也是在恒生的飯堂傾掂。
聯繫密切任證婚人
「阿Sir在任嘅聯交所，幾乎無一項議題要投票決定，所有嘢都係傾出嚟。」袁天凡形容利國偉好像一塊棉花，所有分歧也可以「傾完再傾」，直至達成共識為止，所有人都會被他的魄力、努力感動到，但不要以為阿Sir是牆頭草，「只要佢決定咗，冇嘢可以改變到佢，佢底線企得好穩。」
袁天凡稱，利國偉令他更堅信抱緊原則、堅持底線的重要，而利國偉的智慧，將他帶動另一個層次，即使袁天凡於91年離開聯交所，仍與利國偉緊密聯繫，就連終身大事的證婚人，袁天凡也搵利國偉出任。
《蘋果》記者
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24