黑人物介入政治，易請難送，梁振英落區要元朗古惑仔保駕護航，丟盡了特區政府官員的面子。
以往港英年代好、老董年代好，何曾會出動到黑勢力公然為政客站台。台灣李登輝時黑金政治，以為只不過是電影橋段；日本黑道與右翼勢力勾結，對付教科書出版社及有良知學者，大家以為都係漫畫橋段，邊個會諗到一年下來，香港變成黑金政治。
周日鄉紳古惑仔撐梁行動，是特首選舉時爆出小桃園飯局下集，當日梁營胡混過關，傳媒有意放生，結果一年之後，香港人再次目睹，梁振英管治基礎，係香港最落後之新界鄉紳社團勢力。黑人物做事，冇乜嘢意識形態，眼中只有利益，而要照顧土豪劣紳，不外乎土地利益。梁上任後，已經不知不覺間，向新界利益就範妥協。
變管治手段 香港有難
林鄭月娥落任發展局局長前大鑼大鼓要一視同仁，打擊新界僭建物，為自己贏來不畏強權高民望。但當上第二把交椅，結果就係變成申報特赦，新界僭建特權繼續。至於要立即取締嘅僭建執法工作，大家不妨睇睇屋宇署今年6月如何回覆立法會：
「大規模行動會分階段和有系統地進行。截至2013年5月底，屋宇署已從新界九個地方行政區選取17條目標鄉村，逐村巡查了約4,700幢村屋，並就上述巡查所發現的首輪取締目標僭建物，發出約130張法定命令，勒令業主進行所須工程糾正違規情況。
有關命令涉及的村屋分佈於新界九個地方行政區，涉及的僭建物主要包括樓高四層或以上的村屋，以及覆蓋村屋的有蓋面積超過一半的圍封式天台搭建物。在上述已發出的法定命令中，有四張已獲遵從。」
僭建多一層或以上，已經離晒譜，而所謂大規模巡查，只係17條村，更誇張係只有四戶人跟從法例處理。而究竟政府執法所巡查17條村，有否包括黑色梁粉人士掌舵嘅村呢？更大妥協係新界東北改為公私合營，既照顧大地產商，也照顧為地產商在台前收地之鄉紳，收農地過程當然要有勢力人士幫忙。若收地後由政府收回拍賣，地產商利益受損，鄉紳同樣也受損，換句話幫大地產商收地變咗冇肉食。
從實用主義角度睇，黑勢力辦事效率高，要幾多人有幾多人，敢出位，但政治代價極大。
從青關會、愛字頭、警察於旺角集體晒馬，天水圍鄉紳、古惑仔護航可見，若將警、政、黑整合成一股力量，將選舉時之手段變成管治手段，香港危矣！
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange