金像影后查理絲泰朗（Charlize Theron）雖然總算有工開，但佢主演嘅《開路先鋒》（Mad Max）系列全新一集《Mad Max：Fury Road》仲有排至上畫，搞到佢最近冇乜新聞，見報率大減。唔使愁，樣靚身材亦唔差嘅查理絲，趁上星期38歲生日帶咗歲半大嘅養子Jackson同幾個密友去羅馬度假，喺燦爛陽光底下玩水，好耐冇以比堅尼示人嘅影后，一剝衫當堂春光無限，完全唔會因為做咗人阿媽而疏懶，依然甚有睇頭。而小Jackson仲咁細個，當然要着尿片啦，唔通要阿媽嘆佢啲童子尿咩！之後小朋友仲成身水泡咁由池邊跳落水，查理絲咁錫佢，梗係要伸晒雙手去接實阿仔啦。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！