發展新界東北，至今寸步難行，主因係陳茂波局長在申報利益時，論盡到極，給反對派咬住不放：每次佢講新界東北，反對人士就同佢講「家人買農地」，完全浪費時間，不過要佢走人亦難咯喎，特區政府明知冇人肯自討苦吃，走入最熱嘅發展局廚房，想換都搵唔到人，梁振英如仍有管治權威剩低嘅話，為咗發展新界東北，應該諗諗將現時官員調一調，例如將邱騰華調任環境局長，佢一上陣就識得怎樣去推動堆填區及焚化爐啦，黃錦星係建築師，點睇都應該識土地發展如何配合環境生態嘛，調做發展局長，唔通會差過陳茂波？至於波哥，係梁振英親信/死士，調返特首辦公室做主任，好似現時主任邱騰華咁，閂埋門唔使見大眾，咪唔使惹火囉。如此調動，對各局長嘅運作，滋擾最少，無礙施政，應該有得諗。
八月五日蘋果劉細良專欄談「政治．專業．何建宗」，內有提及曾蔭權在八十年代初擔任沙田政務專員時，發展沙田新市鎮如何有效率，「英人治理低調而專業，有一套制度云云……」劉細良在1984年入讀中大新亞歷史系，唔知有冇見到1976年以後港英政府在沙田拆寮屋，話拆就拆，邊度有今天之「不遷不拆，抗議滅村」嘅聲音呀!?今日之新城市廣場第四期，即宜家家居與康文署總部、排頭村外巴士站至寶福山一帶，原係一條原居民村，政府要收地，條村成條剷起，十分有效率，拆沙田墟起沙田中心、好運中心、新城市廣場、希爾頓中心等等，何曾有甚麼下區諮詢又諮詢十年？填平沙田海嚟起沙田第一城、瀝源邨、禾輋邨等，幾時有人講過海上河裏有珍貴蝦毛？
港英好似英明神武，其實係當年立法會議員全係委任，百分百保皇，無人會反對，區議會亦未有，聽民意就係政務專員與村代表，鄉紳開會吃飯，傳媒方面，個個聽話，華民政務司有權威，報紙社論從來係小罵大幫忙。呢啲條件今日仲邊度有呀？搵番曾蔭權做沙田政務專員咪一樣跪低，剩係區議會已可拖延發展工程幾個月至一年啦，如果七八十年代港英開發新界東北而留下沙田唔郁，沙田海今天那可能在地圖上消失了？三十幾年前嘅政務官未必真係好叻，佢地只係夠運，在一個香港人渴望追求發展追求住屋嘅年代做官箒。