港股一如預期再升多浸，埋單企穩22500點，由於已升抵蟹貨重貨區，加上兩日累升700點，喺呢個位磨一陣正常不過。雖然預期大市整固，但整體氣氛明顯改善，個股party time肯定未完。
阿爺繼續進行逆回購，放水動作停不了，對債重股嚟講乃天大喜訊，熔盛重工（1101）早前受壞消息困擾，股價跌到冇朋友，但最近獲彤叔鄭裕彤睇中，加上內地銀根緊張不再，值博率極高。熔盛上月底宣佈，發行7厘息可換股債券，集資14億銀，每股換股價1蚊，倘悉數行使，相當於已發行股本約16.7%，承配人鼎珮投資來頭不小，乃彤叔御用經紀，故此惹來彤叔入股嘅憧憬。熔盛早前曾表示，正面對資金緊張情況，獲泵水14億銀可令問題大大紓緩。事實上，國務院日前提出七招，促進船舶工業轉型，熔盛作為行業龍頭，絕對有提振作用。
發債消息公佈後，熔盛急速反彈，最高升至1.12元後連日整固，噚日突破三角形，走勢靚絕。公司已發盈警，壞消息盡出，齋挾淡倉都有排升，係咁易用0.6倍PB作目標，可見1.52元，較現價1.11元有37%上升空間，屆時PB仍較同業廣船（317）折讓近四成。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange