噚晚嗰集《衝上雲霄II》純粹睇Sam哥吳鎮宇影帝級演技 ， 及Cool魔張智霖及Holiday（陳法拉飾）「床戲」。
事緣Cool魔同前度女友約會食飯，點知佢個ex飲大兩杯，醉醺醺咁要Cool魔送返家，期間畀路過嘅 Sam哥發現，以為Cool魔又背住Holiday識其他女仔。至於Holiday喺屋企用心溫書，溫到凌晨兩點幾都未見Cool魔返，當Cool魔返到家後，Holiday就大興問罪之師，又扮晒嬲咁返房瞓唔睬佢，Cool魔喺床上甜言蜜語 O氹返對方兼談情，又解釋純粹同個ex食餐飯，之後都冇下文咁話，不過今次床戲，當然冇上次喺古堡咁激啦。
另外，唐亦風（吳卓羲飾）同顧夏晨（胡杏兒飾）遊法國期間，被街頭漫畫家一眼認出顧夏晨，外國人真係好犀利，一眼就認出顧夏晨，其實個漫畫家誤以為顧夏晨係蘇怡，最最最離奇係漫畫家一下就摷返之前張畫作，好厲害呀﹗而顧夏晨亦讓漫畫家完成未完嘅畫作，不過阿風就唔係咁想。阿風將幅畫帶返屋企，點知無意中被Sam哥發現，又勾起Sam哥同亡妻蘇怡的記憶，Sam哥口話冇嘢，但匿埋房時就偷偷飲泣，而鎮宇亦將呢場內心戲發揮得淋漓盡致，令人動容，果然係影帝級人馬。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！