老牌券商粵海證券前日突然話，唔做幾間上市公司嘅財務顧問（FA），正所謂走得快，實係有古怪。原來粵海換老細，新老細打算主力做資產管理，唔做FA，一班做FA嘅高層要另覓出路。
雅天妮（789）、時代集團（1023）、西王特鋼（1266）、大凌集團（211）同才子蕭若元隻無限創意（8079）呢幾間公司，前日齊齊出通告話收到粵海證券通知，因為人事變動，所以唔再做呢幾間公司嘅FA。
所謂嘅人事變動，應該係A股券商國金證券之前一路話買粵海證券，聽聞交易進入大直路，新老細只想專心做資產管理。
於是乎，一班揸住證監會六號牌、做FA嘅高層都搵定後路。喺粵海做咗5年嘅忻若琪已經去咗本地行普頓，據講，其他人已遞信或準備遞信，所以公司咪辭晒啲上市公司FA工作囉。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange