【元朗】
【本報訊】姓黃車行東主，前日凌晨2時許，駕車載同妻兒，沿元朗公路駛返屯門大興花園，當途至屏山對開切線時，赫見迎面一輛紅色福士開篷跑車高速飆至，千鈞一髮間他抽左軚閃避，起初還以為是撞鬼，但對方逆駕過程被駕車外甥拍得。一家三口倖免於難，他返家後即在facebook廣傳事件通緝涉案司機，當日下午即接獲屯門翠峰小築的網友麥太通知，發現該可疑車輛，警方接報後迅速拘捕53歲涉案司機。
「個心真係仲好驚、好激動！」經歷「生死半秒」的黃先生，昨憶述事件時仍猶有餘悸，當晚即落樓燒街衣，今日再往還神，他稱恍如「劫後餘生」般：「好彩當日心血來潮只飲一杯酒，並由我嚟揸車，點知部跑車突然殺埋嚟，好彩扭得切，但部車擺咗兩下都嚇餐死，一諗起成家人差啲啲就……真係仲好驚呀！」
車主非翠峰小築住客
黃先生估計，當時車輛可能由虎地駛上元朗公路，並以時速150公里逆線飆逾7公里，至十八鄉交匯處才駛入元朗：「當時路邊有架警車，但因逆線冇得追。」據了解，該車車主並非翠峰小築住客，而當日該車離開屋苑後35分鐘即駛返，但左邊車轆卻爆胎。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange