雖然帝制早就結束咗，但中國人皇帝癮未斷，袁世凱想翻啅，老毛話中國人站起來，但「毛澤東萬歲」五個字已經說明，佢當正自己係皇帝。
新中國清宮戲何其多，人民心水清，現實共產黨政治同後宮大戲一般無異。
中國人慣咗用「老百姓」形容人民，「老百姓」的帝皇封建味道濃過臭狐。香港好彩俾英國佬霸佔咗咁多年，我地慣咗空手空臂上街無「老百姓」臭狐味；但好景不常，梁振英早幾日落區講咗一句「我都有微服出巡」，我即時想大叫一聲「皇上英明！愛民如子，體察民情，蒼生有幸！」
「微服出巡」？你真係當咗自己係高高在上着龍袍嘅真命天子？終日躲藏深宮大殿處理軍國大事？然後突然記掛天下百姓，毅然以龍軀玉體，深入民間，體察民情，上演《振英微服私訪記》？
梁振英話自己幫襯區內的「粥粉麵飯」食肆，又帶女兒到區內的圖書館，咁嗰間有幸被光顧嘅食肆檔主，駛唔駛跪拜「有眼無珠，未有認出聖駕，罪該萬死！」有幸迎得「公主」鳳鸞的圖書館，係咪要閉館三日，好好封存公主玉手翻閱嘅圖書呢？
咩年代啊？你話落區「親民」都已經有啲作嘔，如果係民主選舉，你呢位特首係由人民選票揀出來，你見市民，應該係匯報工作，向選民交代你嘅工作方向，希望市民滿意你的表現。
真係當咗自己「兒皇帝」有此心態？難怪對市民的請願訴求抗議示威一律當作破壞秩序；古時候，呢啲係刁民告御狀，要跪叩「皇上替小民作主」！
你做皇帝唔該學全套，古時朝廷出問題、政權不穩，皇帝都會下詔罪己，反省檢討自己嘅過失。講到明「罪己」，無得語言偽術，無得卸膊話「唔記得」㗎皇上！