朗尼跳槽，越跳越糟。打工仔想扭計，視乎你有幾多斤両，不過通常都冇乜好下場；而做老闆，則一個大信封，隨時調轉要你成個部門減薪cut人甚至摺埋，為的可能只是集團盈利增長多一兩個百分點。沒辦法，這叫資本主義社會。以前君主政制手持玉璽話事，現在就手握資本大晒，性質其實冇乜變。朗尼算係打工仔中最夠斤両之人，可惜都搞到今日離不開、留不低困局，何解？
莫耶斯當然是關鍵。當日朗尼一知莫耶斯接替費Sir，已心知不妙：「呢個老闆不嬲都唔睇我！仲唔走為上着？」而曾狀告朗尼自傳誹謗的莫帥，口口聲聲二人關係不差；但自上任一直「不續不賣」態度，不似有誠意改善二人關係。上周朗尼被指受傷缺席社區盾賽事，今周卻入選英軍，鶴臣更指朗尼狀態可打正選；若今晚對蘇格蘭朗尼果真生龍活虎，他與莫帥的嫌隙已沒遮掩餘地。正如堅尼所說，勉強留個有離心的球員為乜？漸漸覺得，莫帥唔係要留佢，係要玩佢。
莫帥心知，朗尼不是普通打工仔，除了錢(反正佢有大把)，榮譽才最重要。市場上可以畀得起錢、仲有力爭標甚至歐聯的球隊有幾多？如果球會堅拒放售英超球隊坐大敵人，朗尼就更加無路可走。現最差情況可能是：朗尼今夏走唔成，卻已反晒面，結果成季長坐冷板，就似洛蘭迪上季於畢爾包雪足一年咁。如果係咁，我開始同情朗尼。莫帥會否咁狠心呢？
文：方柏翹
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24