阿爺扭盡六壬撐經濟，刺激港股連續兩日爆上，短線升浪結束呢個預測自然收都收唔切，資金好明顯由美股、日股流入中港股，相信短線好景唔會一兩日就完結。
至於要確認港股係唔係長線翻生，就寧願睇圖做人，要睇長線利淡嘅月線MACD會唔會擺脫沽售訊號，仲要再睇埋8月下半個月。確認係龍係蛇之前，暫時短炒住先，以免跑輸。
見到近排個市開始㷫烚烚，基本因素麻麻嘅內銀、資源股都炒到曉飛，踏入業績期下半場，一批得個殼嘅細價股亦進入公佈業績嘅高𥧌期，相信短線資金都唔會放過喪炒機會，只要部份股條數不太樣衰，單日股價打上一兩成唔出奇，噚日嘅賽得利（1768）就係最好嘅樣辦，出完業績升17%，稍後相信陸續有來。
中期純利勁升1.5倍
細價股業績未蒲頭，就先跟進一隻業績相當靚仔嘅慧聰網（8292），佢中期純利勁升1.55倍至5,230萬元（人民幣．下同），上半年經營現金流達到1.5億左右。由於公司剛剛用咗3.34億元買地起B2B家電中心，唔派息、現金餘額下降都情有可原，而買地發展亦獲得約2億元政府資助。
慧聰網本身從事網上電子商貿業務，唔少原料批發商，鍾意放產品喺慧聰網度賣，呢類業務成本結構簡單，不外乎請吓人維護網站、開發吓網頁、搵人推廣吓網頁咁樣，最緊要佢個平台越嚟越多人用。
喺慧聰網收入爆升同時，佢嘅銷售成本同行政費用基本上維持不變，只有推廣成本跟隨收入上升，形成經營槓桿偏高，收入增加1%，大約可以令盈利增加3%，呢種公司盈利最有爆發力。市面上大部份增長型股份，經營槓桿通常都係一倍，收入同盈利增幅同步，增長想像空間難以同慧聰網比較，但大家賣緊預測市盈率可能都係差唔多。
慧聰網上半年每股攤薄盈利為0.0865分，將上半年盈利乘二計算嘅年度化今年市盈率係34倍左右，但下半年業績相信會比下半年增長，至起碼過去兩年，下半年盈利至少佔全年三分之二，如果今年能夠承接過往兩年趨勢，當下半年盈利佔全年三分之二，每股盈利就有0.329港元，市盈率就只得22.6倍左右。
如果保守番少少，參考舊年下半年盈利按年增幅18%左右，但睇番今年上半年增長勢頭咁勁，相信下半年唔差得去邊，估計下半年盈利按年增長兩成應該夠保守，每股盈利就有0.295港元，市盈率就25.1倍。
綜合上述估計，晉佳預測慧聰網今年嘅市盈率介乎22.6至25.1倍之間，如果用30倍市盈率作為目標價，可以見9蚊。雖然睇圖，股價有升冇跌容易炒，但係個棚實在比較疏，所以限於小注，止蝕可設定跌破6.5元水平。
晉佳
本欄逢周三刊出
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24