做廢紙回收嘅福和集團（923）曾經係新世界發展（017）創辦人鄭裕彤嘅愛股，呢隻股唔經唔覺停牌接近兩年，彤叔乖孫鄭志明（Brian）為幫阿爺搞活呢隻股，一直做好多工夫，公司噚日宣佈，改名兼改公司logo，實行要洗底，莫非係復牌有望？
彤叔出錢超過10億
福和噚日宣佈改名做「綜合環保集團」，放棄之前個橙色logo，整咗個好似太陽咁嘅新logo，仲開咗個新嘅公司網站，好明顯係想重新造人。
福和自從前年因懷疑有人穿櫃桶底停牌，揭發大股東梁契權同佢個妹涉嫌未經董事會同意挪用公司資金，加上調查過程入面，有文件俾人爆格偷走咗，到𠵱家都未復到牌。
據講，彤叔當年因為鋤大弟結識「再造紙大王」梁契權，出名夠義氣嘅佢，唔單止喺福和2010年上市時拍心口掟咗1億出嚟認購，加上福和配股，彤叔前後出錢超過10億。表面上，福和大股東仲係梁契權，但傳聞梁生冇露面好耐，加上聞說當年梁生向彤叔借錢時，將大部份股份抵押畀彤叔，所以彤叔實際上要照顧呢間公司，派出Brian做非執行主席。公司𠵱家改頭換面，對於小股東都係好消息，起碼有人做嘢，仲有復牌希望。
李華華
mailto:[email protected]
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24