國泰航空（293）雖然冇贊助《衝上雲霄II》，但就好似見套劇收得，食住個勢，不停抽水，套劇由7月中推出以嚟，就不停搞推廣活動，先後舉行大型招聘日、推出新頭等艙，仲有撐政府嘅「家是香港」比賽等，本周六又話介紹一個香港青年航空學會。
今輯無贊助
香港青年航空學會由多位國泰本地飛機師，舊年發起組成，現有30多位會員，包括國泰、港龍本地飛機師同政府飛行服務隊從業員，學會主要招收本地大學生為學員，希望啟發佢哋對航空業嘅興趣，遲啲可能向中學生招手。就咁睇，學會嘅工作同《衝上雲霄II》入面，Sam哥同Cool魔整個計劃，發掘後生仔對做飛機師嘅興趣差唔多。
查實約10年前播出嘅《衝上雲霄》，係由國泰贊助。《衝II》國泰冇興趣，改由香港航空贊助，估唔到國泰反而搶到唔少曝光機會，果然薑係老嘅辣。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange