揸住啟豐二號直鏟釣島冇有怕、喺劉霞屋企樓下大嗌唔知驚嘅社運人士楊匡，噚日居然對住民主黨嘅何俊仁眼濕濕，到底所為何事？原來噚日係楊匡同內地維權烈女劉沙沙註冊嘅大好日子，鐵頭仁作為中國維權律師關注組主席，幫兩人主持婚禮當然義不容辭啦。
唔知鐵頭仁係咪平時做開斯諾登嗰類大案，做起結婚呢啲「濕碎」嘢有少少雞手鴨腳，新郎新娘未簽名，就叫主婚人簽名，完成儀式後畀返張證書楊生楊太，突然又話︰「使唔使拎住張證書影呢？都係唔係幾好，好似請願咁。」新郎哥緊張就梗係，仲要心急到暈，未禮成就攬住新娘嚟錫，搞到仁哥要開口叫佢「冷靜啲」。
楊匡話遲啲會以基督教儀式行禮同埋擺酒，急急簽個紙只為方便沙沙下次攞簽證嚟香港。新奶奶對新抱嘅廚藝讚口不絕，又送咗句聖經金句畀新抱仔，內容係馬太福音嘅「你們要靈巧像蛇、馴良像鴿子」，提醒佢哋對住公安唔好咁激動，以免傷身，又細細聲講希望抱個孫，嚇到沙沙即時衝咗出房。
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24