早年被招商銀行（3968）收購咗嘅永隆銀行，為慶祝80周年，推出一本《櫛風沐雨八十年》紀念刊物，詳述銀行由來。原來銀行創辨人伍宜孫得以創辦永隆銀行，全靠佢阿爸伍若瑜一句話，令佢放棄高薪穩定嘅工作，留喺銀號做打雜學嘢，咁先有機會創立永隆。
放棄政府工優差
伍宜孫家世顯赫，聽聞話佢係春秋時代吳國名將伍子胥後人，家族原本亦非常有錢，但伍宜孫喺1918年隨家人由內地來港時遭土匪洗劫，搞到原本家底唔錯嘅伍氏家境日貧。
所謂馬死落地行，伍宜孫同年喺泰來銀號搵咗份工做「後生」，其實就好似𠵱家嘅boy咁，乜嘢下欄嘢都要做，月薪只得兩蚊雞。
伍宜孫當然覺得唔夠使，去咗報考電報生。當時電報生絕對係優差，喺政府做等於金飯碗，淨計訓練期間每個月都有30蚊津貼，畢業後月薪起薪點就有70蚊。
雖然阿仔搵到份好工，但伍若瑜就認為呢份工「生活縱使安定，但卻永無發達之日」。
伍宜孫就係因為阿爸呢句話，決定留喺銀號，學咗唔少技巧，仲畀佢知道當時發牌畀銀號嘅金銀業貿易場，將會提高攞牌門檻，伍宜孫即刻申請入會攞番個牌，改名叫做「永隆」。
1933年，佢開咗永隆銀號，據聞佢原本籌集5.5萬元，但經濟不景有人退股，最終資本金係4.45萬元。去到2008年，一直否認會賣盤嘅永隆時任董事長伍步高，終於將永隆賣畀招商銀行。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange