當日特首選舉的小桃園飯局引起一場黑金風波，令梁民望不斷下挫，領先優勢銳減。上任後挺梁遊行，慌死冇人知，在網上招募職業梁粉，一班金毛在廁所出糧，被傳媒放蛇偷拍，醜態盡現。
周日落天水圍，適逢旺角街頭警察晒馬事件後，挺梁力量竟然夠膽揀一班戴口罩的古靈精怪人物晒馬，同反梁人士衝突，表面上睇梁振英畀佢地咁搞法，想唔死都幾難。新界力量之挺梁方式，好似抽後腳，令梁與主流中產為敵。
梁選擇落區在自己人主場用tough talk作反擊，目的係要顯示佢仍然有管治意志，「everything under control」。從傳媒效果而言，弱勢下搶攻，只會暴露更多缺點，公眾層面已經失分，再加上類似社團式護航晒馬，公眾觀感就更加惡劣，從翌日傳媒連梁粉報也批評，就知道公眾反感。但政府內外都疑惑，為何梁會咁蠢，作自殺式攻擊呢。而新界力量晒馬行動，又是否部署一部份呢？
政界中人揣測天水圍場show，並非做畀香港市民睇，觀眾係北京。梁不惜挑起更大社會矛盾，群眾對立，製造亂局，為咗令北京認為香港陷入混亂，短期內不宜換特首。
呢種陰謀論並非捕風捉影，因為自從張曉明出掌中聯辦後，佢去立法會與泛民議員食飯，之後在政改問題上一改年初強硬篩選論，在在顯示北京希望營造友善和諧的氣氛，以推動政改討論，將佔中運動邊緣化。北京溫和舉措、曾鈺成推動和解；與梁之火上加油，係兩條不同路線。
建制派政務官保持距離
而對梁最大威脅，唔係來自泛民，而係政務官及建制派政客。佢主動拉高政治矛盾，在敵我鬥爭狀態下，大家焗住要撐佢，兩個周日發生嘅群眾對峙，唔係偶然，分分鐘會爆發大規模街頭衝突。
但呢個策略暫時未見效，首先建制派政客及政務官出身之官員，仍然係緘默，保持距離，行會冇人出來呼應。唯一夾到埋嚟只有林鄭月娥幫幫口，其餘兩位司長，甚至保安局局長、政制及內地事務局局長都冇講嘢。至於共產黨擅長政治鬥爭，梁如果係計算北京，試問北京又點會睇唔穿呢？
如果建制派出奇地沉默，呢種沉默，反映咗梁已經無辦法動員建制派。而佢越係動作多多，就越加露底，暴露自己薄弱的政治基礎，再加上主流民意抗拒社團介入政治，最終只會得不償失。
老毛當年擅長一分為二，拉高矛盾，逼人歸邊，因為老毛當時在黨內有領袖魅力，有大量追隨者，先可以用此方法對付政敵，其他人係學唔到。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange