中港股市大翻身，殺淡友一個措手不及，滬綜指埋單重上2100點，港股亦企穩22200點水平。22500點蟹貨區近在咫尺，假若成功破關，散戶購買力可進一步釋放，屆時要挑戰今年高位24000點，絕非無可能。美股今年衝上雲霄，中港股市慘過地底泥，資金流一旦逆轉，中港股隨時升到你唔信。至於點樣可以吸引資金東來，不外乎熱錢趁高沽美股，以及內地有利好消息配合，前者條件已備，後者亦開始成形︰內地PPI跌幅連續兩個月收窄，規模以上工業增加值亦創近半年高，進出口數字在打假下亦有正增長，在在反映經濟已脫離低谷。
內地新增貸款勝預期，遇水即生嘅內房股表現亮麗，碧桂園（2007）突破雙頂阻力，創五年新高。碧桂園上半年實現合同銷售額約336.5億人仔，完成全年銷售目標54%，集團表示，未來五個月會再有多17個新盤應市，加上未來數月係傳統銷售旺季，相信超標只係時間問題。
德銀早前發表報告，預期碧桂園銷售動力可持續，雖然淨負債比率升至60%，但仍較同業為佳，故維持買入評級，目標價睇5.45元，較現價4.74元有15%水位。
唐牛
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24