「免費電影台咁益我？」八方同好多巿民一樣，呢兩日開電視睇新聞，都以為睇緊《古惑仔：江湖新秩序》電影續集trailer。不過對唔住，呢套睇到人𠝹爆咗幾張凳嘅爛戲《政壇古惑仔》並唔係科幻片，而係令人以為喺平行時空嘅紀錄片，由誠信破產但長期有社團關照嘅特首狼振英主演做龍頭689，統領「愛字堆」、「青關會」、「禮義廉」同地區土豪協力，上足一年，死唔斷氣，驚嚇程度非一般，唔只細路仔唔適宜睇，大人睇完都隨時瞓唔着。
金毛上演高潮位
難怪網民林忌都用咗電影《黑社會》改圖，反問黑社會「係民建聯定係陸捌玖？」
刀光劍影年代由江湖飯局揭幕，核心梁粉、現任行會成員羅范淑芬喺特首選舉期間，話就話約班鄉紳選委食飯，不過唔知點解江湖人物上海仔郭永鴻都在場，之後飯焦為咗闢謠，仲反客為主、九唔搭八走去廉署報料，睇到唔少人眼凸凸。
到上年社記同人力拉布阻五司十四局，立法會外面又成班人掟水樽、打差人，年頭撐梁遊行被揭發成班口罩幫收咗錢，好多人開始巧驚驚，連著名評論員練乙錚都質疑梁振英同黑道嘅關係，但原來呢啲都只係過場，套戲嘅真正高潮位原來前日金毛喺天水圍狂毆社民連。
網民整咗大堆電影海報賀噚日生日嘅陸捌玖，狼英繼續無恥就是無敵，唔知北大人會唔會為Plan B新戲上場做緊部署？
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange