電影《華爾街》入面嘅名句「貪婪是好」，令人容易將金錢世界同貪得無厭掛鈎，之不過，佛語有云「若見諸相非相，即見如來」，學星爺喺《國產凌凌漆》話齋：「風筒只係佢表面嘅掩飾，佢其實係個鬚刨」，所以即使喺市場打滾嘅金融界人士，亦可以跟佛理互融。
由經濟盛衰睇因果
聽聞，兩位醉心佛道嘅賓架──匯豐亞太區業務策略及經濟顧問梁兆基，同恒生（011）執行董事馮孝忠，下月1號（星期日），會首次攜手，喺一個名為「從心富起來」嘅心靈講座上，開壇講佛法。
講座由新城電台聯同佛教雜誌《溫暖人間》主辦，內容環繞身心靈健康，假會展舉行，兩位資深市場中人，屆時會抒發銀行家眼中嘅佛、人生起跌感悟生命，同經濟盛衰睇因果報應等題目，聽落相當吸引。
梁兆基謙稱，自己只係以一個非佛教徒嘅佛學愛好者身份，分享心靈富足嘅體會，同埋對財來財去嘅省悟，佢特別提醒華華，佢師傅兼港大佛學研究中心總監釋衍空法師嘅講論先至係重點。以在家居士身份修行嘅馮孝忠亦云，任何職業都一樣，冇分貴賤雅俗，只要符合佛理原則，皆可見佛境。
李華華
mailto:[email protected]
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24