狼英好明顯對林奮強、張震遠等頭號梁粉下台嘅報道深深不忿。佢噚日落區講到痛失奮強一幕，忽然嚟料，不點名咁話《蘋果》當日（8月2日）報道嘅標題係「林奮強辭職，梁班子又倒一個」，「呢種咁嘅標題，唔單止有違事實，對林奮強、對政府不公道，係反智嘅」。
八方一聽到佢咁講，當堂打咗個凸。吓？乜林奮強冇辭職咩？乜冇咗奮強，梁班子唔係又倒一個咩？唔通奮強好打得，冇咗佢，等於梁班子又倒「三個」、「五個」，定係「十個」？如果係嘅話，咁狼英咪可以提早收工？究竟呢個標題，點樣「有違事實」呢？報道事實又點會「反智」呢？唔該狼英公開交代清楚，唔好亂咁噏，抹黑《蘋果日報》喎！
其實八方對當日呢篇報道都好有印象㗎，皆因內文有一個好精美嘅骨牌graphic，麥齊光、張震遠、林奮強等梁班子一個個咁倒下來。
「又倒X個」變萬能Key
八方醒起，自從林奮強辭職後，唔夠十日，先有發展局政治助理何建宗俾《蘋果》揭發佢家族喺新界古洞擁有兩萬呎地皮未申請，8月2日閃電宣佈辭職；近日勞福局政治助理莫宜端又稱因要照顧小朋友而決定跳船。數埋數埋，實情應該：「林奮強、何建宗、莫宜端宣佈辭職梁班子又倒三個」先至啱。家陣狼英咁嘅形勢，「XXX宣佈辭職 梁班子又倒X個」，隨時會成為報紙標題萬能Key，每個月都可以用嚟update呀！
mailto:[email protected]
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24