心急，係現今社會普世價值，而且放諸四海皆通，尤其在球壇。就像「自傳」，本應是記載主人翁的一生，理論上冇番幾條白頭髮都唔應該有。由於球員生涯短暫，所以退休之齡雖值壯年，都會出本自傳賺番筆；不過好似朗尼，22歲已經等唔切出咗「第一本自傳」《My Story So Far》，會唔會早咗啲呢？而且朗尼合約還講明34歲前會出夠5本，隨時自傳變「年報」。再等唔切，其實「朗尼2013年1月至6月上半年傳」都已可發售。
另一樣球壇等唔切要搞的活動，是紀念賽。以前球星紀念賽等於退役賽，是德高望重榮休；仍打得走得，踢「退役賽」？大吉利是咩！但單是今季，已有兩位現役球星謝拉特及里奧費迪南等唔切踢咗紀念賽。謝拉特話晒慶祝成為紅軍隊長10周年，亦是效力球隊15年，點講都係「整數」；相比下里奧的「效力曼聯11年紀念賽」，實顯得有點無厘頭。最慘，除咗曼聯輸波掃晒興外，還暴露了防線不穩兼狀態一般的問題。社區盾前5場友賽曼聯只贏過傑志1場，而且場場有失波，共失11球！相比下，對手如車仔由亞洲之旅到美國的國際冠軍盃一直贏，只係決賽輸給皇馬，曼聯的狀態實在麻麻；周末開鑼戰作客史雲斯，莫耶斯的壓力，可以想像有幾大。
現役球員中誰掛靴辦紀念賽將最震撼？可能是傑斯。到他宣佈掛靴一刻，象徵曼聯7小福全部退役了！如果碧咸、史高斯、加利佬、菲臘佬同畢特齊齊落場助慶，真係有啲衝動飛過英國買飛睇；對手？最適合當然係「拜仁99年元老隊」啦！
方柏翹
now足球評述員
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange