每年暑假都係問責官員及政務官放假嘅時候，尤其不少政務官仔仔女女在英美念大學，借機會共聚天倫。政府公務員放假情緒滿溢，今年施政報告籌備就好緊張，因舊年搞到踢晒腳，初稿差不多唔用得，要重新再寫過，差不多搞到政府印務局趕唔切印。睇過初稿之官員發現689最新網誌，竟然翻炒初稿「樹上無椰子，地下無石油」一句，由此可見佢對當初自己大作畀公務員大筆大筆刪改，心有不甘，借機循環再用。
口號多 實質政策欠奉
其實任何一個普通AO或記者，一見到「樹上無椰子，地下無石油」呢種小學雞EPA教科書文字，都會失笑，但偏偏梁振英判斷力與別不同，甚至偏離主流社會。2003年老董末期，也出現類似病徵。當時董建華面對洶湧反對浪潮，仍認為不過是傳媒名咀嘴鼓動風潮而已，只要封咗名嘴個咪，一切矛盾便迎刃而解。建制派自九十年代一直用呢種懶惰藉口來欺騙北京中央，掩飾自己無能。
梁振英政權乃董建華延續，也繼承了呢種思維，諉過於人。其實任何政權先要思考核心執政綱領係乜，如果好似張志剛定性梁為建制改革派，便要拿出真正改革綱領來爭取公務員、政黨、商界及市民支持，而非空喊口號，將政治失敗諉過傳媒。要在香港定位自己為改革派，不外乎兩大座標，政治上革除少數政治特權，廢除功能組別及小圈子選特首，在問責制及人事任用路線上，起用中間溫和派。在公共財政方面，支持有所得再分配功能的政策，包括pay as you go的老人退休金、介入勞工市場、訂立標準工時、提高利得稅、減少個人薪俸稅等。
如果梁振英提出上述改革綱領，定位清晰，理應可爭取到中間派民意。但可惜一年來公眾根本見唔到改革綱領及實施方案，一味口號多、政治動作多、實質政策少，「建制改革派」形象不但建立唔到，甚至出現巨大落差。好似新界東北發展，由上屆政府傳統新巿鎮發展模式，改為公私合營，倒退回官商勾結模式。
今年份施政報告，如果仍然係空喊口號，成立N個委員會處理短、中、長期，方方面面深層次問題，公眾肯定喊打，梁之所謂改革，其空泛及浮誇將比董建華更甚。「樹上無椰子、地下無石油」一句，其實正好反映出佢自我感覺良好而脫離社會的處境。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange