【公司專訪】
作為紙業股「二哥」的理文造紙（2314），近年雖致力擴產應付定單需求，惟作為龍頭的玖紙（2689）同樣不停起新廠房，故理文一直未能超越玖紙成為「一哥」。理文集團行政總裁李文斌強調，「最大」從來都不是理文的目標，集團目標只得一個，就是要「最賺錢」。
記者:陳健文 陳新政
李文斌接受訪問時表示，理文向來都不會盲目追求產能擴張，着眼點是「每噸紙賺幾多錢」。
自誇生產成本最低紙廠
他說︰「若果用歌手做比喻，理文嘅目標一定唔係攞全年銷售冠軍，我哋要嘅係收入，就好似歌手嚟自拍廣告同拍戲嘅收入，賣碟賣到幾多唔係太緊要。」
他續稱：「我手上雖然冇全面嘅數據，但我好有信心，理文應該係生產成本最低嘅紙廠之一，亦都係最賺錢嘅紙廠之一，集團希望能繼續維持。」截至今年6月底止，每噸紙淨利潤約為423元，較去年底的416元有所上升。玖紙董事長張茵今年2月時曾表示，當持每噸紙淨利潤約為160元（約127元人民幣）。
對於集團上周二公佈將放慢產能擴張，李文斌重申，集團並不是減價擴張速度，只是選擇性地減慢在已飽和地區的擴張，如需求仍不停上升的內地城市，集團反而會加大發展力度。
他說︰「由於近年內需企業發展得好快，好似重慶嘅內陸城市，近幾年對紙嘅需求好大，啲食品廠可以突然打個電話畀你，話想要多一倍嘅紙，所以我哋近幾年都喺內陸城市加快擴張速度……以往主要做出口嘅沿海城市就已經飽和咗，未來應該就唔會再加太多產能。」
價格透明 不能貿然加價
作為差不多等同日用品的包裝及紙品生產商，李文斌指理文只可以「跟着市場走」，市場價格非常透明，不可「話加就加」。他說︰「我哋唔可以想加價就加價，要跟市場供求，特別係近兩、三年內地市場一直都係處於求過於供嘅情況……內地不停淘汰落後產能，但大家都係咁擴產，需求又縮，(供過於求)情況當然冇改善過。」
受到未能在8月起加價及減慢擴張消息影響，理文上周五收報4.55元，較周一下跌逾17%。李文斌表示，每日股價「升升跌跌」並不是管理層主要關心的地方，管理層所關心，是集團發展與盈利能力，若處理好這兩個事項，股價自然會反映。
他說︰「雖然預期前景唔係咁好，但我哋打算繼續將負債比率控制喺65%左右，由於我哋全部都係喺香港借錢，息率約3厘左右，就算之後市況變壞，(理文)都有足夠財力應付。」
李文斌小檔案
職位：理文造紙行政總裁
年齡：32歲
‧ 李運強幼子，2003年加入理文，今年6月升任CEO
‧ 2012福布斯香港富豪榜，李運強家族以17億美元排19位
‧ 育有兩子一女、前仁濟主席、廣東省政協委員
‧ 熱愛跑馬，與家族目前在香港擁有6隻馬，均以「包裝」系名字出賽
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange